وجهة نظر

تحت همّ المسئولية وحاجة البيت اللي تحرم ع الجوامع
يمكن أقدر أوصف باستفاضة
مشكلة تطبيق الغسيل اللي اشتكي من ركنته ع الكرسي
القاموس
فيه العيال والزوج
وأم العيال ف مفهوم البشر حتة وعاء
القلة اللي تحوي مية العطشان
الكف اللي بيشيل الحياة
أداة
هي الماعون
والله من جهلي ما أعرف يعني إيه كلمة ماعون!!

 بكتب وعيني تروح وتيجي عشان ألمح ف عين الكل إعجاب منكروش

بحاول أعمل من تفاصيلي الرتيبة بطولة ما
أساهم ف الحياة من باب أكون
ف الحقيقة المش دوده منه فيه
والوعاء دي نظرتي ببساطة لوجودي
قبول الناس لأقدارهم لغز مُعجز
واتساق الملامح مع الجوهر ممكن يميزني

دعاء فتوح

الاثنين 27 يناير 2014
الساعة 12:55 ظهرا
 

حكاية قديمة

صوتها اللي كان زي الجرس

زغرط ف غيط القطن على صوت الوليد

اللي انسلت وسط البياض

"محصول شقانا ف عمرنا المكتوب عيالنا ولحمنا"

 - نزهة اللي قالت مش أنا-

إيدها اللي ربطت حبل أبويا اللي أنقطع من جوه روحها

شكلت قلبي الملدّن في الصغر

بيتها اللي مبني بطين جدودي

 كان سقفه مفتوح ع السما

وأنا لسه بنت أربعة

 شعبتني سقف البيت بعيد

"البت للعجن اللي بيشكل حياة الناس

والواد لصوت الفاس وعزق الأرض"

يا حببتي قلبي اللي اتروي بلون الخضار

محتاج يفضفضلك

مكسوفة أقولك

 مبعرفش اعجن الناس ف الأمل

بنتي اللي جت للدنيا بمحبة

مش لاقية روحك الحلوة اهديهلها

إزاي أعلمها الحياة والحب وسط الأبنية الصلبة؟!

أزاي أوشم على عنيها الحقيقة من غير ما اعكر روحها الطيبة؟!

"البت للعجن اللي بيشكل حياة الناس

والواد لصوت الفاس وعزق الأرض"

يا حببتي مبقتش الحياة فيا

مبقتش بسمع صوت لفاس أو حتي أرض أحط رجلي عليها!!

روحي اللي هامت في العدم متلخبطة

دلّيني بالعمق اللي خالي من الصور

حبة عجرفة وفظاظة يكملوا صورة الحياة

علشان أوصلها

قوليلي إزاي أحكيلها ع الخضار

واحنا ساكنين ف الزبالة

دي الحقيقة

مبقاش في قطن يلفّها ف توب البياض!!

"محصول شقانا ف عمرنا المكتوب عيالنا ولحمنا،

والبت للعجن اللي بيشكل حياة الناس

والواد لصوت الفاس وعزق الأرض"

كل شيء ف الدنيا ممكن يتوهب إلا البراح

عشان براح الكون بيبدأ من هنا

من جوة قلبي.

دعاء فتوح

الأحد 26 يناير 2014

الساعة 1:40 ظهرا

 ____________________

* نزهة جدتي الله يرحمها

Like

البنت

أفرد على وشي إحساس جديد بالدفء
أخبي بفعل الصدمة قلبي
طعم حاجة البنت للأحضان وللهفة
يساوي طعم عيش المعرفة والبحث عن قلب ووطن
عن أي معني جديد
عن حرية الوصف وأحقية البصمة الوحيدة
عن اكتساب حق الوجود بالفطرة

-البنت زي حنين لريحة البحر
زي الدفا المجروح ف وش الصبح لما يودع حضن حلم جميل
اندهاش عيل بيستني يدوب ف قلب بجد-

عن الحياة والحق

أبويا كان راجل بسيط

على قد معرفته أجتهد
علمنا نغزل يومنا حب
ربانا ع اللقمة النضيفة
ملى أحلامنا خير
حتى لما يقل قوتنا وحمل الحاجة يقطم الوسط النحيل
كان يتحايل على الخوف بالأمل

يمكن كان يمد أيديه علينا من عجز المسئولية
أو ينهرنا عن شقاوة الطفولة والبراءة من ضغط الصداع والفكر
كان يسوق ويشيل على اكتافة الدقيق ويقايض الراحة برغيف يقوتنا
كان أشجع من أصحاب الكتابة والقلم
اللي هروا أيامنا تنظير وضلوا طريق المعرفة
هو البسيط
واجه قلة الحيلة وعاش
قايض على الحزن بعنينا
منحناش
مقبلش يرمي الحمل على الرصيف ويمر ع الدنيا كده
جنبنا مر الحاجة
وحاجة المر الأكيدة
مرت علينا أيام خجلنا من الإيدين اللي الشقا علم عليها خريطة الخير والعطاء
خجلنا من كنا بشر؟؟
يا خيبة الذكري البعيدة المؤلمة عن ضعف رؤيتنا وعمانا
يا فخر قلبي أن أبويا كان بطل
محاربش طواحين الهوا ولا شالش يوم سيف من خشب
كانت حياته آية الشعرا اللي أكلوا منها عيش بشعرهم
حمل الغلابة اللي أتوصف بكلام وتنظير مفتعل
شراكة من غير اجتهاد
فرجة و تعاطف واندهاش
ميغنيش عن حقيقة الفرق العظيم بينه وبين اللي قضي عمره شقي وجهد وبُنا يعلي الولد
___________________________
الأثنين 20/1/2014 الساعة 9:42 صباحا
دعاء فتوح

شهرازاد (1)

كان شهريار يسهر كل ليلةمستوحشا"

فصار سجين ألف ليلة

"و صار سجين الحكاية

1. 

(1)

 ف كل لحظة بختلف
التجربة تحكم
ساعات مبنحتويش حاجة لقلتها
وساعات مبتحويناش علشان كبيرة علينا

روحي ف ايديا 
بديهي
أي اعتقاد أني امتلاك ....
يحتاج ايضاح 
!!!!!!!!!!!!!!!!!!!!!
الورد يوم ما بنقطفه بيقرر أنه يموت
شرط الحياة فيه
مش قدرتك علي أمتلاكه
امكانيته للعطاء مفتاحك المشروط
اوعاك تصدق أن فيه روح تمتلك
!!!!!!!!!!!!!!!!!!!!!!!
_______________________________________

السبت 26 يناير2013
الساعة 7:25 صباحا

http://www.youtube.com/watch?v=VxuJd-T04QA

أعتذر للصبح..
عبثا أراك فأنت مرتبك بميعاد العمل.
أعتذر للحلم ..
عبثا أعيشك فليلك أصم بآنات الثكلي والمساكين.
أعتذر لحبيبي..
عبثا أحتويك فنفسي تحويني وترهقني وتثقل كاهلي.

روحي
ورقة قديمة بالقلم الرصاص تكتبني التجارب
والعمر
استيكة خايبة تمسح المكتوب وتسيب أثر
ينحت ملامحي
ارتباك
..هي الحياة مخلوقة من ربكة المفاهيم
مابين صح وغلط بعيش إنسان
أظلم عشان أطهر روحي من وصمة الانبيا
أشوف حجمي الحقيقي
أنحني للحق