"زي كل الناس"
فوق الورق
أحب أتعري بشياكة
أفك أزرار الحكاية بخفة
أزحف علي مشاعري
وأدغدغ ممكنات الحلم
يمكن الرعب اللي سكناه من زمن ..
يندهش ويخاف
إيقاع اليوم سريع
يتسابق
مع احتياجاتي اللي مابتخلصش
كل لحظة تكنولوجيا جديدة
تكسب الحياة تعقيد
تعقيد
يستهلك ملامحي
في لعبة البنت الجميلة
باستقامة القامة اللي تبرز تفاصيل الجمال
في اتجاهين متعاكسين
يحولني
سكن فاضي..
متاح..
منهك..
غريب عني
يتكلف لحصد إعجاب الجميع
بيني وبين نفسي
سر الحياة في نفس خارج يمكن ميرجعش
ماليش حيلة أذكي من قبول نفسي
بعنين يدوب تلمح زوايا ضعفها
تبص تاني علي الحقيقة
جميلة
بكتف محني ِسنّة..
تسمح لأفكارها ترتاح من السبق
ليست هناك تعليقات:
إرسال تعليق